هو هنون ولد بوسيف امير اهل هنون لعبيدي احدى امارات اهل اعمر بن الفحفاح من امارة اولاد امبارك.
يقول الشاعر سدوم رحمه الله في مدح الامير هنون رحمه الله:
أفُگراشْ انْجُوعْ انْقَيْوَان    //==//      شِيْخْ انزَايلْهَ واحْلِلْهَ
بِيهْ اتشُومْ ولَرْظْ السَّيْحانْ  //==//     اِيرَحّلْهَ واِينَزّلْهَ
أغْلَظْهَ واَكْبَرْهَ دِيوَانْ      //== //   وأرَيّسْهَ وأسَطْفَلْهَ
وَاطْرَبْهَ تَوّ اللِّعْبْ ءُكانْ  //== //    الْمَصِيبَ يِتحَمّلْهَ
بِالْخَيلْ الحرّاتْ ءُ لَظْعانْ  //==//   وَاصْحابْ الْمُلْكْ امْگدّلْهَ
كانْ اطْرَحْ فَرَاصَ تِزْيَانْ  //==//  رَبِّ للنّاس ايْحَفّلْهَ
ومَسْلَ ذابِحْهَ فِلْكِرْعانْ == فَرْظْ اعْلَ امْباَرك يَوْكَلْهَ
هَنُّون الِّ عَرْبْ اِيتِتّان == التّالِ مِنهَ وَاوّلْهَ
مِثلُ فِيهَ عَمُّ عِثمَانْ == ؤبُگَّ سلطان امْحَافِلْهَ
ؤعَمُّ بَكّارْ اغْليظْ الشّانْ == أكبَرْهَ زَوْگَ واعْقَلْهَ
اخْليفِتْ گَوْجَايْ الفِرْسان == للتّانِتْفُرْتْ ايزَگّلْهَ
يصْدَف مُلاهَ فِلْمِسْلانْ == فَرْصُ تِهْرِدْ گَدْحْ اكْفِلْهَ
واِيجِ جانِبْهَ طفْلْ الشان == امْلَقْمَسْ مِن دَمْ اكْفِلْهَ
هَنونْ اَكانْ اصْبَحْ غَضْبانْ == عِگدَ فِي وِجْهُ يَعْمَلْهَ
اللهُمّ وِجْهْ البُرْتانْ == ؤلا حَدْ اِيظَلْ امْگابِلْهَ
ما يِحْمِلْ بِيهَ كُونْ افْلانْ == افْلانْ ؤلاهُ حَامِلْهَ
ؤگمَانْ العِلْبَ والتِّمْتانْ == مُحَالْ اتگيسُ بِجْهَلْهَ
هَيْبِتْ مُولْ الْمُلْكْ السبحان == إشْ يَعْمَل حَد امْتِينْ إلْهَ
الشّرْ اعْمَلْ فيه البُرْهان == واخبارْ الشِّيعَ كَمّلْهَ
ؤعادِيهْ ارْمَحْهَ بالقِزْيانْ == ؤهَذَاك الْ عادْ امْجَفّلْهَ
تَوْ ٱِيجِ فَٱرْبَعْ مِيتْ ٱعْنَانْ == ؤهُوّ هُوّ گاعْ أرْجَلْهَ
وٱوْلادْ الفَحْفَاحْ الظّمّانْ == طُولْ الشّرْ ٱِيلَ دَامْ ٱلْهَ
مَا تِذْرِحْ فيه ، ؤلا تِلْيان == ؤلا گطْ ٱلْطَامُ مَلَّلْهَ
ؤلا گطْ ٱتنَزّهْ فِي لَوْطانْ == عَرْبِ كاتِلْتُ وٱكْتِلْهَ
ؤلا گط ٱكتِلْهَ گاعْ ٱزمانْ == ما نِزْلِتْ فِمْنَيْنْ ٱكْتِلْهَ
وٱمْرَگْ هُوّ بَلُّ حَشْمان == ؤفِدْيَارُ سَدّاوْ ٱحْلِلْهَ
هِيّ يُومْ ٱلْ تَگبَظْ لَظْعَانْ == تِجْبِدْ تِتْمَعْيَرْ فِرْجِلْهَ
وِلْ ٱنچَرْتُ مَانَللَّ كانْ == ما يَحْظَرْ وِسْطْ ٱفْزُوعْ ٱلْهَ
هِي كِيفْ ٱجنود السلطان == بِكْنَايِنْهَ وٱحْمَايِلْهَ
وٱعْمَايِمْهَ شَاشْ أرَوَان == وٱعْكَارَ فِي دَلايِلْهَ
ؤمَحْزَمْتْ ٱمّبَّرْ والقفطان == وٱحْرَامْ ٱمْطَرّزْ گَادِلْهَ
وٱبنودْ ٱعلَ عِيدَان ٱزّانْ == ٱف جَعْبْ النّصَارَ يَنْعَلْهَ
وٱقفافير ٱعْلَ كِلْ ٱلْوَانْ == تِظْوِ فِشّمْسْ ٱمْدَاوِلْهَ
طاگِتْهَ بُوفُمّيْنْ ٱگرَانْ == وٱسْلاحْ افْ بَيْظْ اتحَمّلْهَ
تَسْمَعْ كَمْ مِن زَامِلْ كَلْشَان == ٱدْهِيرُ لَرْضْ ٱيزَلْزَلْهَ
وٱتشَوف ٱصواگِيهَ تِتبَانْ == تِتحَاذَ ذَيْكْ ٱمْعَازِلْهَ
بُو رَمْظانَيْنْ ؤبو رَمْظَان == بِٱگْفُفْ وٱگْطاطِ تِعْزِلْهَ
وتَسْهَ فِلْقَالَ والقفطان == وٱدْرَامِزْ رُوصْ ٱمطافِلْهَ
وٱدراريع البُوگْ الشِّهبان == تِظْوِ فِشّمْسْ ٱمْكاحِلْهَ
يِعْمِ عَنهَ عَيْنْ الْمِعْيَانْ == ؤلا صَابِتْ نِيِّتْ دَاحِلْهَ
هَذاكْ ٱفلانْ ؤذاك ٱفلان == ٱمّالْ العادِي تِحْمِلْهَ
تِتقامِسْ فِي رَهْجْ الدّخّان == عادَ مَعْرُوفَ گاعْ ٱلْهَ
وٱلِّ شَلّتْ سَعْدُ يِشْيَانْ == ؤوَيْلْ ٱلْ عَاطِ بِٱگْفَاهْ ٱلْهَ
يَكْرَمْ مِن كَم مِن شَعْناَن == بِخْبِيط الدّفْعَ تَعْمَلْهَ
وٱتحوص الفارس فِلْمِسْلان == فَرْصُ تِهْرِدْ گَدْحْ ٱكْفِلْهَ
وٱللَّ تَصْدَفْ مِن بَل ٱگرَان == الگندُوز ؤرَاصْ ٱرْجِلْهَ
بِحْدَجْ گالِبْ مُوسَ نِصْرَان == ذُوك أيّاكْ ٱمن ٱمْقَاتِلْهَ
گايِدْهَ هَنونْ السلطان == ٱعْلَ ٱثرُ مِنْبَجْ أوّلْهَ
مِتگفّلْ تَحتُ مِنتْ ٱحْصَانْ == خامِرْهَ شَيْ ٱمْشَاوِلْهَ
زَافُوفَ تَقلَبْ مِيتْ ٱعنانْ == ٱعْلَ لَسِيمْ ٱيحَمّلْهَ
ؤمَرّ تَحتُ زَامِلْ كَلْشَان == خَيْلْ الْمَجْبُودَ يَحْفَلْهَ
ٱيسَنّدْ بِيهَ شَوْرْ أقَنّانْ == وَكْتَنْ تِنْشَلْ إيوَيْتَلْهَ
هاذَ ماهْ ٱنُّ دَيْ ٱلْسَانْ == ٱعْمَلْ ذِ الْحِيلَ وٱعْمَلْهَ
وٱعمَلْهَ فِنْجُوعْ إيوَلانْ == ؤفِكْرَاعْ الناگَ ، سَوّلْهَ
وٱعمَلْهَ طاحْ ٱعلَ فِرْگانْ == أولادْ ٱعْبَيْدِ سَگبَلْهَ
وٱعمَلْهَ فِعْرَبْ بِدّمْيَانْ == وبْگِرْگِلْ لَكْحَلْ سَرْمَلْهَ
جَابْ ٱلِّ فيهَ مِن حَنْحَانْ == ؤلا خَلّ بَگرَ وٱعْجِلْهَ
ٱصْبَرْ صَبْرْ ٱمْتَيْتَلْ قَضْبَان == ماهُ بِالصّوْگْ ٱمْعَجّلْهَ
يِبْقِ عادْ ٱيسَابِگْ لَظْعَانْ == عامِدْهَ واللَّ غَافِلْهَ
إليْن ٱگفَحْهَ لِلِّ بَان == ٱف وِسْطْ الرّكْنَ يَوْكَلْهَ
ؤلُولَ خَوْفْ اكْلامِ يِشْيَانْ == فَعْگابْ الصَّبَّ وَاوّلْهَ
انگولْ انُّ عَرْبِ سلطان == وسَمْيُ لَخْلاگْ ايْمَلْمَلْهَ
خَيْل ازعيمْ انْجُوعْ اِيوَلانْ == راجِلْهَ ووْلِدْ راجِلْهَ
الخيل الا قلبت تزيان ///////// والا ما قلبت لا يشكيك
اتم اعياط الخوف اكران /////// وامخاليق الل في فيك
ازعيم امبارك وارجالو  /////// واشياخت بوه اجدُ ذيك
وشياخت عمو واخوالو /////. يلداحستاك له انوصيك
اخير الا تُو خلالُو   ////////  كانك بنعم اهد يهديك
هو كالعه بفعالُو      /////// وبذي والل ذ والل ذيك
الشاعر الكبير سدوم ولد انجرتو ، ورائعته المعروفة في الوسط الفني باسم "تفرغ زينه" .